Familoka

W czornyj pościeli obudzioł się i najscoł do ausgusa
Achim Żymloczek prosty chop co żyje choby musioł
W ajncli mu zimno, kurzy cigaret, zaroz na plac wylezie
Som przy chlywiku na koło siado, i patrzy co to bydzie
Potym połazi, posznupie w hasiach, wózyk by się przydoł
Kedyś boł mody, lepij mu boło, a dzisiaj potrz jako biyda
Gruba zawarli dziesięć lot nazot i tak już tam niy robioł
Wypadek pedzieli że z jego winy i tak pozostoł som sobie

Smyntnych myśli smoła żolu tych boroków
Czorno rozpocz woło z łokiyn familoków

U prywaciorza potym za frajer, robioł a tyn mu niy płacioł
Co dzień przeproszoł, coś obiecywoł, a potym gizd sie stracioł
Achim oglondo się ino za siebie, teroz już niy za robotom
Na automatach tyż już łon niy gro, niy tak jak reszta chopów
Pynzyjo wziyli bo Achim zdrowy choć szłapa jedno mo krótszo
Bo łod kolana mo łon holzbajna fest boli jak sie poruszo
Szuko po szofkach co by tu zeżryć som ino puste flaszki
Skup jes otwarty jutro łod ósmyj tyn zygor cisnom wancki

Smyntnych myśli smoła….

Z opieki dajom ciynki zasiłek na cigarety i piwo
Siedzi przy drugim, czecim, dziewiontym i włazi zaś w ajnfart krziwo
Zaś się zagodoł, jak boł bergmonem, toć go już nikt niy sucho
To boły czasy, to boło życie, niy to co terozki tukej
Ćma już na placu, siedzi bamontny tak mu tyn dziyń przeminoł
Jakby tak znalyź piyńc kilo miedzi, by sie pojodło, wypiyło
Wyczyścioł szoły, łoblyk sie ancug bo mundur przedoł niestety
Na eks wypioł halba, legnął na szezlong, wiedzioł że czeski metyl

Smyntnych myśli smoła…..